Türkmenistan

Balkanyň häkimiýetleri sadaka soraýan, dilegçilik edýän raýatlara gözegçiligini güýçlendirip, olara garşy geçirýän reýdlerini ýaýbaňlandyrdy. Saklanan raýatlar, şol sanda çagalar gowaça meýdanlarynda otag etmek işlerine mejbury çekilýärler. Bu barada Azatlyk Radiosynyň habarçysy 13-nji maýda sebitden maglumat berdi.

“Türkmenbaşy we Balkanabat şäherleriniň köçelerinde polisiýa işgärleri tarapyndan saklanan uly raýatlaryň we çagalaryň azyndan 150 sanysy Bereket etrabyndaky pagta meýdanlaryna eltildi” diýip, ýagdaýlardan habarly ýerli daýhan anonim şertde gürrüň berdi.

Degişli maglumat

Aşgabadyň häkimiýetleri telekeçilere jerime salyp, zibil dörýän çagalara garşy ‘göreşýär’

Gowaçanyň otag işlerine çekilýän raýatlara we çagalara bir gün çeken zähmeti üçin 15 manat hak tölenjekdigi wada berilýär. Ýöne bu haky tölemek pagtaçy kärendeçileriň boýnuna ýüklenýär.

“Olara jogapkär polisiýa ofiserleri we oba arçyny hem gözegçilik edip, mydama üstlerinde bolýarlar” diýip, ýerli daýhan aýtdy.

Azatlyk bu barada welaýat Polisiýa müdirliginden we ýerli oba hojalyk resmilerinden teswir alyp bilmedi.

Bu waka, ýurduň gowaça ekilen meýdanlarynda gögeriş suwuny tutmak, gögeriş alnan meýdanlarda hatarara bejergi, ýekelemek we otag etmek işleriniň geçirilýän mahalyna gabat geldi. Bu barada Ministrler Kabinetiniň 10-njy maýda geçirilen mejlisinde mälim edildi.

Bereketli bir pagtaçy daýhan anonim şertde habarçymyza beren maglumatynda otag işlerine mejbury çekilýän raýatlaryň we çagalaryň hiç hili daýhançylyk düşünjesiniň ýokdugyny aýdyp, olaryň özleri üçin peýda däl-de, zyýandygyny belleýär.

“Meniň 10 gektar meýdanymyň otag işleri üçin dilegçilikde saklanan 10 sany adamy berdiler. Häkimiýetler daýhançylyk düşünjesi bolmadyk bu raýatlary öz-özüni ekläp bilmeýän pagtaçy kärendeçileriň boýnuna ýükleýärler” diýip, bereketli pagtaçy daýhan belledi.

Onuň tassyklamagyna görä, häkimiýetler kärendeçi daýhanlaryň hasabyna, işsiz dilegçileri iş bilen üpjün etmäge, olaryň dilegçilik etmeginiň öňüni almaga çalyşýar.

Degişli maglumat

Balkanda 'prezidentiň abraýyna kölege salýandygy' aýdylyp, dilegçilere we zibil dörýänlere garşy reýd geçirildi

Türkmenistanda dowam edýän ýiti ykdysady kynçylyklar, giň ýaýran işsizlik, harytlaryň we hyzmatlaryň ýygy-ýygydan gymmatlamagy ilatyň sosial-ykdysady şertlerini barha agyrlaşdyrýar.

Bularyň arasynda, soňky ýyllarda ýurtda sadaka soramaga, dilegçilik etmäge ýa-da zibil dörmäge mejbur bolýan raýatlar, şol sanda çagalar göz-görtele köpelýär.

Türkmen häkimiýetleri ykdysady kynçylyklar we onuň ilata ýetirýän täsirleri barada hiç hili mesele gozgamaýarlar, döwletiň maddy kömegine mätäç maşgalalaryň anyk sanyny hem äşgär etmeýärler.

Muňa derek, häkimiýetler dilegçileriň we zibil dörýänleriň “prezidentiň we ýurduň abraýyna kölege salýandygyny” aýdyp, olara garşy wagtal-wagtal reýd geçirýärler.

Galyberse-de, Türkmenistanyň hökümeti oba hojalyk pudagynda, şol sanda dokma senagaty üçin zerur bolan çig mal serişdeleriniň önümçiliginde mejbury zähmetden peýdalanmakda ýyllarboýy tankyt edilýär.

Häkimiýetler ýüpek gurçugynyň ideg işlerinde, gowaçanyň otag işlerinde, ýeralma ýygnamak we pagta ýygmak işlerinde býujet işgärleriniň, esgerleriň, öňki tussaglaryň zähmetinden peýdalanýar. Bu işler üçin býujet işgärlerinden pul ýygnalýar ýa-da özlerine derek hakyna adam tutmak talap edilýär.

Degişli maglumat

Aşgabatda ilatyň azyk ogurlamagy bilen bagly wakalar köpelýär

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

Konstitusiýa we Baýdak gününiň bosagasynda, hem-de Magtymguly Pyragynyň 300 ýyllygy mynasybetli geçirilýän medeni çäreleriň fonunda, içerki migrantlar paýtagtdan kowulýar, welaýatlardaky býujet işgärleri medeni çärelere mejbury gatnaşmak üçin Aşgabada iberilýär. Bu barada Azatlyk Radiosynyň habarçysy 13-nji maýda maglumat berdi.

Türkmenistanyň Konstitusiýasynyň hem-de Döwlet baýdagynyň güni 18-nji maýda bellenilýär. Bu sene mynasybetli edara-kärhanalarda we guramalarda işlenilmeýär.

Azatlyk Radiosynyň Balkan welaýatyndaky habarçysy Aşgabatda geçirilýän medeni çärelere günbatar sebitden 500 çemesi býujet işgäriniň mejbury tomaşaçy hökmünde iberilendigini habar berýär. Şol bir wagtda, bu çäreler bilen baglylykda welaýatlardan paýtagta gelip zähmet çekýän içerki migrantlar gyssagly ýagdaýda öz ýaşaýan welaýatlaryna mejbury iberilýär.

Degişli maglumat

Dünýä Türkmenleri: Magtymguly Pyragynyň 300 ýyllygy bellenilýär

Aşgabadyň polisiýasy içerki migrantlary paýtagtdan çykarmak işlerini geçen hepdäniň anna gününden (10-njy maýdan) bäri batly depginde alyp barýar.

“Polisiýa işgärleri gurluşyk meýdançalaryna aýlanyp, içerki migrantlary ele salmak we olary öz ýaşaýan welaýatlaryna ibermek çärelerini ýygjamlaşdyrdy. Aşgabatda howpsuzlyk çäreleri güýçlendirilýär” diýip, Azatlyk Radiosynyň Balkan welaýatyndaky habarçysy gurluşyk işgärlerine salgylanýar.

“Polisiýa içerki migrantlaryň paýtagtyň görküni gaçyrýandygyny aýdýar” diýip, welaýat ýaşaýjylary aýdýar.

Häkimiýetler Aşgabatda geçirýän halkara medeni çäreleriniň fonunda, içerki migrantlaryň, hususan-da daşary ýurtly myhmanlaryň gözüne görünmeziligini gazanmaga çalyşýarlar.

“Ýurduň sypatyna erbet täsir ýetirýärsiňiz!” diýip, paýtagtdan çykarylan içerki migrantlar polisiýa tarapyndan özlerine aýdylan sözleri getirýärler.

Azatlyk Radiosynyň habarçylary öz çeşmelerine salgylanyp, 18-nji maý – 25-nji maý aralygynda Aşgabatda howpsuzlyk çäreleriniň güýçlendirilýändigini, bu möhüm seneleriň öňüsyrasynda häkimiýetleriň paýtagty içerki migrantlardan arassalamak işlerini doly tamamlamagy meýilleşdirýändiklerini habar berýär.

Polisiýa tarapyndan tutulan welaýat ýaşaýjylary köne awtobuslarda öz ýaşaýan sebitlerine ugradylýar.

Ýurduň keşbine şek ýetirmekde aýyplanýan içerki migrantlar, welaýat ýaşaýjylary paýtagtdan çykarylýan mahaly, welaýatlarda ýerleşýän edara-kärhanalardaky býujet işgärleri möhüm seneler mynasybetli geçirilýän dabaralara mejbury tomaşaçy hökmünde gatnaşmak üçin paýtagta iberilýär.

Degişli maglumat

Aşgabatda Magtymgulynyň ýadygärligini açmaga näme üçin howlukmaýarlar?

“Medeniýet işgärleri, belli-belli şahyrlar, magaryf işgärleri we harbylar Aşgabatda Magtymguly Pyragynyň 300 ýyllygyna bagyşlanyp geçirilýän dabaralara, şeýle-de Türkmenistanyň Konstitusiýa we Baýdak güni mynasybetli geçirilýän çärelere gatnaşmak üçin Aşgabada iberilýär” diýip, Azatlyk Radiosynyň Balkan welaýatyndaky habarçysy maglumat berýär.

Sanly ulgam arkaly 25-nji aprelde geçirilen hökümet mejlisinde aýdylmagyna görä, 18-nji maýda Aşgabatda Türkmenistanyň Konstitusiýasynyň we Döwlet baýdagynyň güni mynasybetli dabaralar, baýramçylyk konsertleri, şeýle-de durky täzelenen Baş baýdak meýdançasynyň açylyş dabarasy meýilleşdirilýär. Bu barada döwlet telewideniýesi habar berdi.

Şeýle-de, şondan bir gün ozal, 17-nji maýda Aşgabadyň günorta künjeginde “Magtymguly Pyragy” medeni-seýilgäh toplumynyň hem-de Magtymguly Pyragynyň 300 metrlik ýadygärliginiň açylmagyna garaşylýar.

Döwlet metbugatyna görä, bu seýilgähde Pyragynyň täze ýadygärligi bilen bir hatarda daşary ýurtlaryň meşhur şahsyýetleriniň, ýazyjy-şahyrlarynyň hem heýkelleri ýerleşdirilipdir. 10-njy maýda geçirilen hökümet mejlisinde bu seýilgähde gurluşyk we ýanaşyk ýerleri abadanlaşdyrmak işleriniň tamamlanandygy habar berildi.

25-nji maýda Türkmenistanda Aşgabat şäheriniň güni bellenip geçilýär.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.